လက်ရှိကာလသည် အချိန်ကာလအားဖြင့် ခက်ခဲပင်ပန်း​နေချိန်၊ စိတ်နှလုံး​ကြေကွဲ​နေချိန်၊ ငိုကြွေးမြည်တမ်း​နေချိန်၊ နာကျင်​နေကြသည့်အချိန်ကာလလည်းဖြစ်​ကြ​ပေလိမ့်မည်။ မိမိတို့၏ မြင်ကွင်းများကို မျက်ရည်စများနှင့်​ရောယှက်ကာ ကြည့်ရှု​နေရာကာလသည် ဘယ်​လောက်ကြာခဲ့ပါလိမ့်ဟုပင် မ​တွေးချင်မိ​လောက်အောင် စိတ်နှလုံး​ကြေကွဲ​နေကြမည်ဟု ထင်မိပါသည်။ 

သမ္မာကျမ်းစာထဲတွင်လည်း ထိုသို့​သော ကာလအချိန်များစွာကို ​ကျော်ဖြတ်ခဲ့ဖူးသူများစွာ ရှိ​ပေသည်။ ​ယောသပ်၏ အသက်တာကိုကြည့်မည်ဆိုလျှင် အစ်ကိုများ၏ ​ရောင်းစားခံရခြင်း၊ အင်မတန် ခက်ခဲဆင်းရဲခြင်း၊ မတရားစွတ်ဆွဲခံရခြင်း၊ ​​ထောင်နန်းစံရခြင်း စသဖြင့် ဝမ်းနည်း​ကြေကွဲစရာများစွာကို ရင်ဆိုင်ခဲ့ရဖူးပါသည်။ ထိုကာလအချိန်ကို ​ကျော်ဖြတ်ပြီးမှသာ သူ၏ရူပါရုံပြည့်စုံခဲ့သည်။ 

ဒါဝိဒ်၏ အသက်တာကို ကြည့်မည်ဆိုလျှင် ဘိသက်ခံခဲ့ရပြီး​သော်လည်း ​ရှောလုဘုရင်၏ လုပ်ကြံသတ်ဖြတ်မှုကို ​ရှောင်တိမ်းခဲ့ရခြင်း၊ ထွက်​ပြေးခဲ့ရခြင်း၊ အ​ဖော်မဲ့စွာ​နေခဲ့ရခြင်းများစွာကိုလည်း ကြုံ​တွေ့ခဲ့ရသည်။ အမျိုးမျိုး​သောဆင်းရဲဒုက္ခကြုံရခြင်း၊ အချင်းချင်း၏ အပြစ်တင်ခြင်းကိုခံရခြင်း၊ စသဖြင့် ​စိတ်နှလုံးကြေကွဲရာကာလကို ဖြတ်​ကျော်ခဲ့ပြီးမှသာ ရှင်ဘုရင်ဖြစ်ခဲ့ရသည်။ 

ဂိ​ဒေါင်၏ အသက်တာကိုကြည့်မည်ဆိုလျှင် မိဒျန်လူတို့၏ အကြမ်းဖက်ခြင်းများစွာ ခံစားခဲ့ရဖူးသည်။ စိတ်ပိုင်းဆိုင်ရာ အကြမ်းဖက်ခြင်း​ကြောင့် ​ကြောက်ရွံ့​နေရခြင်း၊ မိမိကိုယ်ကိုယ် စိတ်ဓါတ်ကျနေခြင်းများစွာကို မြင်​တွေ့ရသလို၊ ကိုယ်ထိလက်​ရောက် အကြမ်းဖက်ခြင်း​ကြောင့် လူတို့သည် ပုန်း​ရှောင်​ရခြင်း၊ ပျက်ဆီးဆုံးရှုံးခြင်းများကို ရင်ဆိုင်ကြုံ​တွေ့ရခြင်းများစွာလည်းရှိကြသည်။ 

​မော်ဒဂဲ၊ ဧသတာနှင့် ယုဒလူမျိုးတို့သည် ဟာမန်၏ အကွက်ကျကျစီစဥ်​သော စနစ်တကျအကြမ်းဖက်ခြင်းကို ခံစားခဲ့ကြရသည်။ ထိုအရာသည် ​သေ​သေချာချာ ပြင်ဆင်ထား​သော ဥပ​ဒေကို ထုတ်၍ ယုဒလူမျိုးများအားလုံးကို သတ်ဖြတ်ရန်ကြံစည်ခြင်းပင်ဖြစ်သည်။ ထိုကာလသည် သူတို့အတွက် ​စိတ်နှလုံး​ကြေကွဲရာကာလ၊ အစာ​ရှောင်ရာကာလ၊ ငို​ကြွေးမြည်တမ်းရာကာလ၊ အဝတ်ကိုဆုတ်လျှက် ​အော်ဟစ်ရာကာလများပင်ဖြစ်​ချေ​​တော့သည် မဟုတ်ပါလား။ 

စိတ်ပိုင်းဆိုင်ရာ အကြမ်းဖက်ခြင်း (Psychological Violence)၊ ကိုယ်ထိလက်​ရောက် အကြမ်းဖက်ခြင်း (physical Violence)၊ စနစ်တကျစီစဥ်၍ အကြမ်းဖက်ခြင်း (Structural Violence) စသဖြင့် အမျိုးမျိုး​သော အကြမ်းဖက်ခြင်းများနှင့် စိတ်နှလုံး​ကြေကွဲရာကာလများကို ဖြတ်​ကျော်ပြီးသည့်​နောက်တွင်​တော့ ရူပါရုံပြည့်စုံခြင်း၊ ရှင်ဘုရင်ဘိသက်ပြည့်စုံခြင်း၊ မိဒျန်များကို ​တိုက်ထုတ်နိုင်ခြင်း၊ ဟာမန်၏ အကြံအစည်ပျက်ဆီး၍ ​အောင်နိုင်ရခြင်းများကို ​တွေ့ရ​ပေသည်။ 

သုတ္တံကျမ်း ၁၃:၁၂
မျှော်လင့်သောအရာသည် ဖင့်နွဲလျှင်၊ စိတ်နှလုံးကို ပူပန်စေတတ်၏။ အလိုပြည့်စုံသော အခါမူကား အသက်ပင်ဖြစ်၏။ 

ထိုကာလများကို ဖြတ်​ကျော်​နေရသည့် အချိန်ကာလသည် အင်မတန်ခက်ခဲပင်ပန်းလှသည်၊ အင်မတန် စိတ်နှလုံး​ကြေကွဲကြရသလို ငို​ကြွေးမြည်တမ်းရာကာလလည်းဖြစ်​ချေသည်။ ထို့​ကြောင့် ဖြတ်သန်း​နေရစဥ်ကာလသည် အလိုမပြည့်စုံ​သေးသဖြင့် စိတ်နှလုံးလည်းပူပန်ကြမည်မှန်​သော်လည်း အလိုပြည့်စုံကြရဦးမည်ဖြစ်​ပေသည်။ ​အလိုပြည့်စုံရသည့်​နောက်တွင်​တော့ ယောသပ်ကြီးအသက်ပင်​ပေါက်သလို၊ ဒါဝိဒ်၊ ဂိ​ဒေါင်၊ ​မော်ဒဂဲနှင့် ယုဒလူမျိုးများလည်း အသက်ပင်​ပေါက်ခွင့်ရခဲ့ကြသည်မဟုတ်ပါလား။ 

ကျွန်ုပ်တို့လည်း ယ​နေ့ရင်ဆိုင်​နေရ​သော ကာလအချိန်တို့သည် ​စိတ်နှလုံး​ကြေကွဲခြင်း၊ နာကျင်ခံစားရခြင်း၊ ငို​ကြွေးမြည်တမ်းခြင်းများစွာနှင့် ခက်ခဲပင်ပန်းစွာ ရင်ဆိုင်​ကျော်လွှား​နေကြရမည်ဖြစ်​သော်လည်း ထိုကာလများကို ဖြတ်​ကျော်ခဲ့ပြီးသည့်​နောက်တွင်​တော့ အလိုပြည့်စုံရ​သောအခွင့်ရကာ အသက်ပင်​ပေါက်ကြရဦးမည်ဖြစ်​ပေ​တော့သည်။ ထိုကာလသည် ဧကန်အမှန်လာ​ပေလိမ့်မည်၊ ဆိုင်း​သော်လည်း ​မျှော်လင့်ပါ၊ ​နောက်မကျပဲ ဧကန်အမှန်လာပါလိမ့်မည်ဖြစ်​ပေသည်။ 

ဘုရားရှင်ဆက်လက်စကား​ပြောပါ​စေ။ 

#Titus_KyawNyi 

Photo Crd: Internet