နိုင်ငံ​ရေးမှာဖြစ်​စေ၊ စီးပွား​ရေးမှာဖြစ်​စေ၊ ပညာ​ရေးမှာဖြစ်​စေ၊ ဝိညာဥ်​ရေးရာမှာဖြစ်​စေ အင်မတန်အ​ရေးကြီးတဲ့ သတိထားရမည့် အချက်တစ်ချက်ရှိသည်။ သို့​သော်လည်း "သတိမမူ ဂူမမြင်" ဟုဆိုရိုး ရှိသည့်အလား သတိမမူမိတဲ့အခါမှာ​တော့ သတိလက်လွတ်ဖြစ်သွားတတ်ပါတယ်။ 

နိုင်ငံ​ရေးမှာ​တော့ "လူကိုမကြည့်နဲ့ မူကိုကြည့်ပါ" ဆိုသည်မှာ စံထားကြတဲ့ ​ဆောင်ပုဒ်တစ်ခုဟု ဆိုရ​ပေမည်။ တိုးတက်ပြီး အချုပ်အခြာအာဏာ တည်တံ့ခိုင်မြဲ​သော နိုင်ငံတစ်နိုင်ငံကို သတိထားကြည့်ရ​မယ်ဆိုရင်ဖြင့် လူ​တွေက မူဝါဒကိုကြည့်ကြတယ်၊ ပြည်သူ့အကျိုးပြုမည်လား၊ ပြည်သူအ​ပေါ် ​မေတ္တာ​စေတနာရှိရဲ့လား၊ နိုင်ငံ​​တော်ကို ငြိမ်းချမ်း​စေမလား၊ လူမျိုး​ရေးခွဲခြားသလား၊ ဘာသာ​ရေးမှိုင်းမိသူလား၊ စသဖြင့် အ​ခြေခံမူကိုကြည့်၍ မဲ​ပေးကြသည်။ အကယ်၍သာ လူကိုကြည့်ပြီး​ရွေးမည်ဆိုလျှင် လူက​တော့ ဟုတ်မလိုလိုရှိ​သော်လည်း မူဝါဒ​တွေ၊ တိုင်းပြည်နှင့်လူမျိုးအ​​ပေါ် ထား​သော စိတ်ထား​တွေ မ​ကောင်း​လျှင် ပြည်သူလူထုကသာ ထိုအကျိုးဆက်​တွေကို ခံစားရမည်မဟုတ်ပါလား။ အတုယူရန် နိုင်ငံတကာမှာ သက်​သေ​ပေါင်းများစွာ ရှိ​နေ​ပေသည်။ 

"မိမိကုန်ပစ္စည်းကို​ ရောင်းထွက်ရန်သာ အဓိကထားပါ၊ လူကိုမကြည့်နဲ့၊ မချစ်​သော်လည်း ​အောင့်ကာနမ်း" "အလုပ်ကိစ္စနဲ့ကိုယ်​ရေးကိုယ်တာ ခွဲခြားသိပါ" စသဖြင့်သည် စီးပွား​ရေးသမားများ၏ အားသာချက်ဖြစ်သည်။ စိတ်ခံစားချက်​ပေါ်မူတည်၍ ဒီလူ့ကြည့်မရလို့ မ​ရောင်းဘူး၊ သူ့ကိုသ​ဘောကျလို့ အလကား​ပေး၊ စသဖြင့် ​​ပေါ့​ပေါ့တန်တန် အလုပ်မလုပ်ကြပါ၊ လုပ်မိရင်​တော့ ပွဲပျက်သွားမည်၊ စီးပွားပျက်သွားမည် ဖြစ်သည်။ ​ထို့အတူ လောင်းကစားသမားများသည်လည်း စိတ်ခံစားချက်ကိုလိုက်၍ ​လောင်းကစားမလုပ်ကြ​ချေ။ ဆိုကြပါစို့ ... မန်ယူကို ကြိုက်လွန်းရင်​တောင်မှ အ​ခြေအ​နေမ​ကောင်းရင် ​ပေါက်​ကြေးမ​ကောင်းရင် မ​လောင်းကြပါ။ လုပ်ကြရင်​တော့ ထိုသူ​တွေကို တကယ့်စီးပွား​ရေးသမား၊ ​လောင်းကစားသမားဟု ​ခေါ်ဆို၍မရ​​​တော့ချေ။ စိတ်ခံစားချက်​ပေါ်လိုက်၍ စီးပွား​ရေးလုပ်ခြင်း၊ ​လောင်းကစားလုပ်ခြင်းပြုလျှင်​တော့ များမကြာမှီ ခွက်ဆွဲကြရမည်မဟုတ်ပါလား။ (​တောင်းစားရင်လဲ ဟိုလူ​ပေးလို့မယူဘူး၊ ဒီလို​ပေးလို့မကြိုက်ဘူးဆိုရင်​တော့ ငတ်မှာပါ) 

ဝိညာဥ်​ရေးရာ မှာ​တော့ လူကိုသာကြည့်ပြီး သမ္မာတရားကိုမကြည့်ရင် အန္တရာယ်မည်မျှရှိမည်နည်း။ ဝိညာဥ်​ရေးရာအတွက် စံထားရမည်မှာ သမ္မာတရားဖြစ်သည်၊ မိမိသိခြင်း၊ တတ်ခြင်း၊ နားလည်ခြင်း၊ ခံယူခြင်း၊ ဆရာသမားသွန်သင်ခြင်း စသဖြင့်ကို သမ္မာကျမ်းစာနှင့် တိုင်းတာရမည် မဟုတ်ပါလား။ သို့မှသာ သမ္မာတရားနှင့် လွဲ​ချော်​နေရင် သိနိုင်မည်။ အချို့က​တော့ သွန်သင်ခြင်း အရမ်း​ကောင်းပါတယ်၊ သစ္စာလဲ အရမ်းရှိတယ်၊ သို့​သော်လည်း သခင်​ယေရှုသည် ဘုရားမဟုတ်ဘူး လူဖြစ်တယ်လို့ဆိုကြတယ် သို့မဟုတ် ဘုရားငယ်​လေးလို့ခံယူကြပြန်တယ်။ အချို့အဖွဲ့ကလည်း သမ္မာကျမ်းစာ အနည်းငယ်ကိုသုံးပြီး လူ​တွေကို​ခေါ်တယ် သို့​သော် ​ယေရှုက တရုတ်ပြည်မှာ​ပေါ်လာတယ် အမျိုးသမီးဟုဆိုကြပြန်တယ်။ ဒီလူ​တွေကို ပြန်ပြီး သမ္မာတရားကို​ပြောပြတဲ့အခါမှာ လက်မခံနိုင်ပဲ၊ သူတို့သိထားတာကသာ သမ္မာတရားဟုဆိုကြ​လေတယ်။ သူတို့ရဲ့ဆရာသမား​တွေနဲ့ သူတို့​ပြောသမျှ လုပ်သမျှ သင်သမျှ​​တွေကိုသာ ကြည့်တတ်ကြပြီး ဖြန့်ကျက်မကြည့်​ကြလို့ရယ်၊ မသိစိတ်​ရော အသိစိတ်ကပါ မျက်စိပိတ်နားပိတ် ဖြစ်​နေခြင်းရယ်​ကြောင့်ဖြစ်တတ်ပါတယ်။ နိုင်ငံ​ရေးမှာလဲ ဒီလိုမျိုးဖြစ်တတ်ကြတာကို နားလည်ရတယ်။ 

ရှင်ယောဟန်ခရစ်ဝင် ၈:၃၁-၃၂
ထိုအခါယေရှုက၊ သင်တို့သည် ငါ၏ဒေသနာ၌ တည်လျှင် ငါ့တပည့်အမှန်ဖြစ်ကြ၏။
သမ္မာတရားကိုလည်း သိကြသဖြင့်၊ ထိုတရားသည် သင်တို့ကို လွှတ်လိမ့်မည်ဟု၊ ယုံကြည်သော ယုဒလူတို့အား မိန့်တော်မူ၏။ 

ကျန်းမာချမ်းသာ ​ဒေသနာရှင်​တွေကို ကြည့်မလား၊ ​ယေရှုနဲ့ခရစ်​တော်ခွဲတဲ့ အယူလွဲအဖွဲ့​တွေကို ကြည့်မလား၊ ​အပြစ်ဝန်ချ ​နောင်တရရန်မလိုဟုဆိုသူ​တွေကို ကြည့်မလား၊ Joel Osteen, Paula White, Joyce Meyer, Kenneth Copeland စသဖြင့်တို့ကို ကြည့်မလား သခင်​ယေရှု​ပြောတဲ့ ငါ့​ဒေသနာ၌ မတည်​ပဲ အလွဲ​တွေ​ဟော​နေ​ပြော​နေ​သော်လည်း အချို့​သောသူ​တွေက ဆက်လက် လိုက်ပါ​နေကြ​သေးသည်၊ လက်ခံ​နေကြ​သေးသည်၊ သမ္မာတရားဟုပင် ထင်မှတ်​နေကြသူများ ရှိ​နေကြပါ​သေး၏။ အဘယ့်​ကြောင့်နည်း။ အနည်းငယ် စဥ်းစား သုံးသပ်ကြည့်ရ​အောင်လား ... 

သမ္မာတရားကို​ ထောက်ပြ​ကြတယ်၊ ခွဲခြားပြကြတယ်၊ တိုက်စစ်ရန် သမ္မာကျမ်းစာလည်းရှိပါတယ် သို့​သော် ဒီအရာ​တွေက ဩဝါဒ​အလွဲတွေ ဖြစ်တယ်ဆိုတာကို လက်မခံကြဘူး။ အ​ရေးအကြီးဆုံးအချက်သည် မသိချင်တာဖြစ်တယ် ​မှောင်မိုက်တန်ခိုးရှိနေလို့ ဝိညာဥ်မျက်စိ မမြင်နိုင်တာလည်း ပါတာ​ပေါ့၊ ကြားထား​သော စကားနှင့် အပြုအမူ​တွေကလည်း လွှမ်းမိုး​နေသည်။ ထို့အတူ မှား​နေတယ်ဟုထင်မိ​သော်လည်း လူကိုစွဲလန်း​နေသည် ထို့​ကြောင့် သိ​အောင် မလုပ်​တော့ပဲ မျက်စိမှိတ်လက်ခံလိုက်ကြသည်။ မိမိကိုယ်ကို ငါယုံတာအမှန်ဟု လှည့်စားမိသည်၊ မှား​ကြောင်း မရှာ​ဖွေ​တော့​ချေ။ သူများ​ပြောရင်လဲ မကြိုက်​တော့ ခံငြင်းကြရပြန်သည်။ အချို့ကြပြန်​တော့ အသက်တာနဲ့သွန်သင်ချက်သည် လွဲ​နေတာမြင်ရ​သော်လည်း ချည်​နှောင်ခြင်းတစ်ခုရှိ​နေ၍ မ​ရှောင်ထွက်နိုင်ပြန်ဘူးပဲ။ ​နောက်ဆုံးမှာ​တော့ အလွဲယူ အယူလွဲရင်း ကယ်တင်ခြင်း သင်္ဘော​မှောက်သွားကြသူ​တွေ ဒုနဲ့​ဒေးရှိပါတယ်။ 

သမ္မာတရားကိုသိရင် လွှတ်ခြင်းကိုရမည်ဆို​သော်လည်း ထိုသူတို့ တ​​ဆေး​ရော​ထားတဲ့ သမ္မာတရားဟု​ခေါ်​ဝေါ်​သော မသမ္မာတရားက​တော့ ထိုသူတို့အား ချည်​နှောင်လို့ပင်ဖြစ်မည်။ "ဘာသာ​ရေးက ဘိန်းလိုပဲ" ဟုဆို​သော အချက်ကိုပင် သတိရမိပါတယ်၊ ဟုတ်ပါတယ် လူ​တွေကို အမှန်တရားကဘာလဲဆိုတာကို မမြင်နိုင်​လောက်​အောင် မျက်စိကန်း​စေတတ်ပါသည်။ အဘယ့်​ကြောင့်ဆို​သော် ဘာသာ​ရေးအ​ကြောင်းပြလိုက်ရုံဖြင့် နိုင်ငံ​ရေး၊ စီးပွား​ရေး၊ လူမှု​ရေး၊ ဝိညာဥ်​ရေး စသည်ဖြင့် မည်သည့်အရာကိုဖြစ်​စေ လှည့်ဖျားနိုင်စွမ်းရှိသည်မဟုတ်ပါလား။ ထို့​ကြောင့် လူကိုသာကြည့်လျှင် မိမိနှစ်သက်ရာကိုသာ ​ရွေး​ရွေးပြီး မြင်နိုင်သည်ဖြစ်​သော်လည်း သမ္မာတရားကို ကြည့်မှသာ ထိုလူ၏ လှည့်စားတတ်​သော ချည်​နှောင်ခြင်းမှ လွတ်​မြောက်နိုင်မည်ဖြစ်သည်မှာ ​မြေကြီးလက်ခတ်မလွဲ ဖြစ်​ပေ​တော့သည်။ 

ဒါ့​ကြောင့် ဆရာတင်မှားရင် ​ကြောက်စရာ​ကောင်းလှသည်။ ​ကောရနှင့် အ​ပေါင်းအပါများလည်း သက်​သေရှိ​ချေ​သေးသည် မဟုတ်ပါလား။ အလွဲအမှားဖြစ်မှန်းသိရင် ပြင်ဖို့ ​နောင်တရဖို့၊ ဩဝါဒအလွဲကို ထားခဲ့ဖို့လို​သော်လည်း ထိုသူ​နောက်ကို ဆက်လိုက်​နေခြင်းသည် ​ကြောက်စရာတစ်ခုပင်ဖြစ်သည်။ ထိုကဲ့သို့အရာများသည် ​နေရာ​ပေါင်းစုံတွင်ရှိသည်ကိုလည်း မြင်နိုင်သည်။ မိမိဘဝမှာဖြစ်​စေ၊ နိုင်ငံ​ရေး၊ စီးပွား​ရေး၊ ဝိညာဥ်​ရေး ​နေရာစုံတွင်ရှိသည် မဟုတ်ပါလား။ ထိုသူများသည် အဘယ့်​ကြောင့် ပြန်မလှည့်နိုင်ကြသလဲဆိုရင် "တည်မိတဲ့ဘုရား ကျီးပင်နားချင် နားပါ​စေ​တော့ ကိုးကွယ်ရ​တော့မည်" ဟုဆိုသကဲ့သို့ပင် ဖြစ်​နေကြသလား​တော့ ကျွန်ုပ်လည်း မသိ​တော့​ချေ။ ဒါ့​ကြောင့် နိုင်ငံ​ရေးကိုကြည့်မလား၊ လူမှု​ရေးကိုကြည့်မလား၊ စီးပွား​ရေးကိုကြည့်မလား၊ အသင်း​တော်မှာ သင်းအုပ်ခန့်မလား၊ ဝိညာဥ်​ရေးကိုကြည့်မလား၊ မည်သည့်နယ်ပယ်ကို ကြည့်ကြည့် လူကိုမကြည့်နဲ့ မူကိုကြည့်ပါဟုဆိုသည့်အတိုင်း ကျွန်ုပ်တို့ယုံကြည်သူ​တွေသည် သမ္မာတရားကိုကြည့်ကြရ​ပေမည်။ ဒီလူမှာ Gospel ပါသလား၊ ခရစ်ယာန်တစ်​ယောက်၏ စံနှုန်းရှိသလား၊ သမ္မာတရားနဲ့အညီအသက်ရှင်သလား၊ အသက်ရှင် လုပ်​ဆောင်ခြင်း​တွေသည် သမ္မာတရားနဲ့ကိုက်ညီသလား၊ သူ့ရဲ့ခံယူယုံကြည်ချက်ကဘာလဲ၊ ဘယ်အဖွဲအစည်းကလဲ၊ သူ့ကိုသွန်သင်​ပေး​သော ဆရာက သမ္မာတရားနဲ့ညီသလား၊ သူတပါးကို သနားတတ်သလား ​မေတ္တာရှိသလား၊ လူမျိုး​ရေးသမားလား၊ လူလူချင်းခွဲခြားတတ်သလား၊ နှိမ့်ချမှုရှိသလား၊ ဘုရားသခင်ကို ချစ်သလား စသဖြင့်​တွေကိုကြည့်၍သာ ​တော်ကီလား ​ဘော်ဘီလားကို သိနိုင်ကာ လူ၏ချည်​နှောင်ခြင်း ဘက်လိုက်ခြင်း (Bias)မှ လွတ်၍ သမ္မာတရားကိုလည်းသိ၍ လွတ်ခြင်းကို ရရှိနိုင်မည်မဟုတ်ပါလား။ 

ဘုရားရှင်ဆက်လက်စကား​ပြောပါ​စေ။ 

#Titus_KyawNyi 

Photo Crd: Internet