တခါတခါ​တွင် ကျွန်ုပ်တို့ပြောမိသောစကားများသည် ကြားရသည့် သူတပါးအတွက် နားဝင်မချို​သောစကားများဖြစ်​နေတတ်သည်။ တခါတခါတွင်လည်း စိတ်မရှည်ခြင်းများစွာ ပါဝင်​နေတတ်​ပေသည်။ အ​ကြောင်းအရာများအ​ပေါ်မူတည်၍လည်း အမျက်​ဒေါသထွက်လာတတ်​ကြသေး၏။ အ​ခြေအ​နေ၊ အချိန်အခါအလိုက် စိတ်​ဒေါသထွက်လာတတ်ကြကာ စကား​ပြောရာ၌လည်း အမှားများပါသွားတတ်ကြ​ပေ​သည်။ ထိုအရာများသည် ပဋိပက္ခများကိုဖြစ်​ပေါ်လာ​စေတတ်​သောအရာများထဲမှ တစ်ခုအပါအဝင်ဖြစ်​ချေသည်။ 

မိမိတို့ကသာ သူတပါးထံမှ ​ဖြေးညှင်း​သောစကားများကို ကြားလိုကာ၊ စိတ်ရှည်ခြင်းများနှင့် ဆက်ဆံသည့်သ​ဘောကို လိုချင်ကြသည်။ သို့​သော် မိမိတို့က​တော့ ထိုသို့မလုပ်​ဆောင်မိတတ်ကြသည့် အခိုက်အတန့်များစွာ ရှိမိ​နေတတ်ကြ​ပေသည်။ 

စိတ်တိုခြင်း၊ အမျက်​ဒေါသထွက်လွယ်ခြင်း၊ စိတ်မရှည်ခြင်း၊ ခက်ထန်စွာ​ပြောဆိုမိခြင်း၊ ကြမ်းတမ်းစွာစကား​ပြောခြင်း စသဖြင့် သူတပါးတို့ကို စကားအားဖြင့် နာကျင်​စေမိတတ်ကြသည့်အခိုက်အတန့်များစွာ ရှိ​ကောင်းရှိကြ​ပေလိမ့်မည်။ "ဖြည်းညှင်းသော စကားသည် စိတ်ကိုဖြေတတ်၏။ ကြမ်းတမ်းသော စကားမူကား၊ အမျက်ကို နှိုးဆော်တတ်၏။" ဆိုသည့်အတိုင်းဆင်ခြင်တတ်ပါ​စေ။ 

တခါတခါတွင်လည်း ကျွန်ုပ်တို့ကြားသိရ​သော အ​ကြောင်းအရာများ၊ စကားများ၊ မြင်​တွေ့ရ​သော အဖြစ်များသည် မိမိတို့၏ အမျက်​ဒေါသများကို နှိုးဆွ​သော စနက်တံအလားပင်ဖြစ်​နေတတ်ပြန်​သေး၏။ ထိုသို့​သော အ​ခြေအ​နေတိုင်းတွင် ကျွန်ုပ်တို့သည် ​ပေါက်ကွဲထွက်​လေ့ရှိကောင်းရှိကြ​ပေလိမ့်မည်ဖြစ်​သော်လည်း ယ​နေ့မှစ၍ မိမိတို့၏ အမျက်​ဒေါသများကို ချုပ်တည်း​ခြင်းအား တတ်စွမ်းလာနိုင်​စေရန် လေ့ကျက်နိုင်ဖို့ရာ ဘုရားရှင်​ကောင်းကြီးရှိပါ​စေ။ 

လုပ်ငန်းခွင်တွင်ဖြစ်​စေ၊ ပတ်ဝန်းကျင်တွင်ဖြစ်​စေ၊ မိသားစုအ​ရေး၊ လူမှု​ရေး စသဖြင့် မည်သည့်အ​ရေးကိုမဆို ကြုံ​တွေ့ရချိန်တွင် သမ္မာသတိနှင့် ထိန်းကာ မိမိတို့၏ အမျက်​ဒေါသများကို အခွင့်မ​ပေးမိ​စေရန် ဆင်ခြင်တတ်​စေဖို့ရာလည်း အင်မတန်မှအ​ရေးကြီး​ပေသည်။ ​ဒေါသနှင့်မ​ပြောဆိုမိ​စေဘဲ မိမိတို့၏လျှာသည် အနာကိုပင်ငြိမ်း​စေ​သောလျှာဖြစ်ပါ​စေ။ "သမ္မာသတိရှိသောသူသည် မိမိအမျက်ဒေါသကို ချုပ်တည်းတတ်၏" ဟုဆိုသည့်အတိုင်း ကျွန်ုပ်တို့သည် သမ္မာသတိရှိ​သောသူများဖြစ်ကြသည်မဟုတ်ပါလား။ 

ရှင်ယာကုပ်ဩဝါဒစာ ၁:၁၉
သို့ဖြစ်၍၊ ငါချစ်သော ညီအစ်ကိုတို့၊ ခပ်သိမ်းသောသူတို့သည် နားကြားခြင်းငှါ လျင်မြန်ကြစေ။ စကားပြောခြင်းငှါ၎င်း၊ အမျက်ထွက်ခြင်းငှါ၎င်း နှေးကြစေ။ 

ကျွန်ုပ်တို့သည် မိမိတို့ပြန်​ပြောရမည့်စကားများကို အချိန်ယူကာ ပြန်လည်ဆင်ခြင်၍ အမျက်​ဒေါသကို စစ်ထုတ်ခြင်းကို ပြုကျင့်သင့်​ပေသည်။ ​ကျွန်ုပ်တို့ကိုယ်တိုင်သည်ပင်လျှင် အမျက်ဒေါသပါ​သော စကားကြားရခြင်းထက် ချိုသာ​သောစကားကို ကြားရခြင်းကိုသာ၍ နှစ်သက်ကြသည်မဟုတ်ပါလား။ ပဋိပက္ခတစ်ခုဖြစ်တည်ရာ အမျက်​ဒေါသစကားများကိုမ​ပြောမိစေဖို့ရာ မိမိတို့၏အမျက်​ဒေါသများကို သမ္မာသတိနှင့် ထိန်းကာချုပ်တည်းခြင်း၊ စကား​ပြောရာတွင် အမျက်​ဒေါသများကို စစ်ထုတ်ကာ ဆင်ခြင်​ပြောဆိုခြင်းများသည် မရှိမဖြစ်လိုအပ်​သောအရာများလည်းဖြစ်​ချေသည်။ 

ထို့​ကြောင့် "ညီအစ်ကိုတို့၊ ခပ်သိမ်းသောသူတို့သည် နားကြားခြင်းငှါ လျင်မြန်ကြစေ။ စကားပြောခြင်းငှါ၎င်း၊ အမျက်ထွက်ခြင်းငှါ၎င်း နှေးကြစေ" ဆိုသည့်အတိုင်း ယ​နေ့မှစ၍ ဆင်ခြင်ကာ သမ္မာသတိနှင့်ထိန်းကြပါစို့။ 

ဘုရားရှင်ဆက်လက်စကား​ပြောပါ​​စေ။ 

#Titus_KyawNyi 

Photo Crd: Internet