ဆရာမအိနှင့် စကား​ပြောရင်း မြင်ရကြုံရသမျှကိုပြန်လည် သတိရမိကာ စာ​ရေးဖို့ရန် ​ပေါ်​ပေါက်လာခဲ့ပြန်သည်။ ကျွန်​တော်ငယ်စဥ်က ယခုကဲ့သို့ ​ပြောတတ်ကြ​သော စကားများကို ကြားခဲ့ဖူးပါသည်။ "ပါးစပ်က ဘုရားဘုရား လက်က ကားယားကားယား" ဆိုခြင်းသည် အ​ပြောနဲ့အလုပ်မညီသူ၊ ဘုရားကို ဟန်ပြလုပ်​ဆောင်သူဖြစ်ခြင်းကို ​ဖော်ပြ​သောစကားစုဖြစ်​ချေသည်။ ထိုစကားသာမက "ခရစ်ဟန်" ဆိုသည့်စကားကိုလည်း ကြားခဲ့ဖူးပါသည်။ ခရစ်​တော်ကို ယုံကြည်သလိုလို ဟန်​ဆောင်တတ်​သော ခရစ်ယာန်တစ်ဦး၊ တနည်းဆိုရ​သော် အ​ပေါ်ယံ အ​ရေခြုံ​သော ခရစ်ယာန်ကို "ခရစ်ဟန်" ဟုဆိုရ​ပေမည်။ 

​နောက်တစ်ခုက​တော့ "ဗုတ်ခရစ်" ပင် ... ဟိုလိုလို ဒီလိုလို မပြတ်မသား၊ ဗုဒ္ဓလိုလို ​ယေရှုလိုလို နှင့် ဟိုမပြတ် ဒီမပြတ်ဖြစ်သူများဖြစ်သည်။ ဘာလာလာ ရှိခိုးခြင်း ကိုးကွယ်လိုက်ခြင်းပင်ဖြစ်​လေသည်။ ယခုတွင် အသစ်တိုး​သော စကားကို ထည့်ရမည်ဆိုလျှင်ဖြင့် "ခရစ်ရံ" ပင်ဖြစ်​ချေသည်။ ရ​ကောက်နှင့်ရံ​သော "ခရစ်ရံ" များသည် မိမိတို့ စိတ်ခံစားချက်အ​ပေါ်လိုက်၍ "ဝန်းရံခြင်း" ဖြစ်​ချေသည်။ ဝန်းရံသည်ဟုဆိုရာတွင် လူအမျိုးမျိုး၏ ကြိုက်နှစ်သက်ရာအ​ပေါ် မူတည်၍ အမျိုးမျိုးကို ဝန်းရံကြသည်။ 

အချို့က ဆရာသမားများ၊ ဂိုဏ်းကနများ၊ ပါတီများ၊ နိုင်ငံ​ရေးသမားများ၊ နိုင်ငံ​​တော် သမ္မတနှင့် လူပုဂ္ဂိုလ်များ စသဖြင့်​တွေကို ဝန်းရံကြသည်။ ဥပမာ ဆရာသမား၏ လွဲမှား​သော ဩဝါဒကိုဖြစ်​စေ၊ မှားယွင်း​သောသွန်သင်မှုကိုဖြစ်​စေ ကရုမစိုက်ဘဲ သမ္မာတရားနှင့် လွဲ​နေပါ​စေဦး​တော့ ဝန်းရံကြသည်။ ထိုသူ၏ အမှားကို ​ဖော်ပြလျှင်လည်း လက်မခံဘဲ ကာကွယ်ခြင်း၊ ဆရာ​သမား ဟောကြားသည့် မှားယွင်း​သော ဩဝါဒများနှင့် ထိုဆရာသမားကို ဝန်းရံခြင်းဖြစ်သည်။ ထိုဆရာငရဲသွားလျှင်လိုက်မည်၊ ကျီးကန်းဖြူတယ်ဆိုလျှင် လိုက်ဖြူမည်၊ ဗျိုင်းကြီး မဲတယ်ဆိုလျှင်လည်း လိုက်မဲသည်အထိ ဝန်းရံကြ​သည်။ 

​ပေတရုကြီးပင်လျှင် ​ယေရှုခရစ်​တော်၏ ကားတိုင်လမ်းကို ပိတ်စို့ကာ ဝန်းရံခဲ့ဖူးသည်။ ​သူက​တော့ ​စေတနာနှင့် ​ကောင်းမည့်အထင်နှင့် မိမိစိတ်ခံစားချက်အလိုအတိုင်း ဝန်းရံခြင်းဖြစ်​သော်လည်း ​ယေရှုက ... 

ရှင်မဿဲခရစ်ဝင် ၁၆:၂၃
  ကိုယ်တော်သည် မျက်နှာတော်ကိုလှည့်၍ အချင်းရန်သူ၊ ငါ့နောက်သို့ဆုတ်လော့။ သင်သည် ငါတိုက် မိ၍ လဲစရာအကြောင်းဖြစ်၏။ သင်သည် ဘုရားသခင်၏အရာကို စိတ်မစွဲလမ်း၊ လူတို့၏အရာကိုသာ စွဲလမ်း သည်ဟု မိန့်တော်မူ၏။ 

မဝန်းရံခိုင်းခဲ့ပါဘူး။ ဘုရားသခင်၏အရာ​တွေကို မစွဲလန်းဘဲ လူတို့၏အရာ​တွေကိုသာ စွဲလန်း​သော ​ပေတရု၏ ဝန်းရံခြင်းကို အပြစ်တင်ခဲ့ရုံမက အချင်းရန်သူ ဟုပင်ဆိုခဲ့​လေသည်မဟုတ်ပါလား။ ဒါဆိုရင် ​သခင်ယေရှုသည် ဝန်းရံ​​​လေ့ရှိကြ​သော ရ​ကောက်နှင့်ရံသည့် "ခရစ်ရံ" များကို နှစ်သက်ခြင်းမရှိသည်ကို ထင်ရှားစွာမြင်​တွေ့ရမည်ဖြစ်သည် မဟုတ်ပါလား။ 

(မဿဲအခန်းကြီး ၂၇) တွင်ကြည့်မည်ဆိုလျှင်လည်း ဝန်းရံခြင်း​နောက်တမျိုးကိုမြင်​တွေ့ရပါတယ်။ သခင်ယေရှုတွင် မပြစ်မရှိ​​ကြောင်းကို ပိလတ်မင်းသိ​သော​ကြောင့် ဗာရဗ္ဗနှင့် ​ရွေးခိုင်းခြင်းကို သိကြမည်ထင်ပါသည်။ ဗာရဗ္ဗဆို​သောသူသည် လူသတ်၊ ကလိမ်ကျ၊ လူဆိုးလူမိုက်တစ်ဦးဖြစ်​ချေသည်။ သို့​သော် လူထုကြီးက​တော့ သခင်​ယေရှုအ​ပေါ် ဘာသာ​ရေးအ​ကြောင်းပြချက်၊ နိုင်ငံ​ရေးအ​ကြောင်းပြချက်​တွေများစွာဖြင့်သာ မသိချင်​ယောင်​ဆောင်ခဲ့ကြသည်မဟုတ်ပါလား။ သို့နှင့် မိမိတို့၏ စိတ်ခံစားချက်၊ ဆန္ဒများစွာ​ကြောင့်သာလျှင် လူသတ်သမားဖြစ်တဲ့ လူဆိုးလူမိုက် ဗာရဗ္ဗကိုသာ ဝန်းရံခဲ့ကြ​လေ​ခဲ့တော့သည်။ 

​ယေရှုက ငါ့၌ ဆည်းကပ်လို​သောသူဖြစ်ရင် ကိုယ်ကိုကိုယ်ငြင်းပယ်ရမယ်လို့ဆိုပါတယ်၊ ထိုမျှမက​သေးဘဲ ကိုယ့်လက်ဝါးကားတိုင်ကို ကိုယ်ထမ်းကာ သူ့​နောက်လိုက်ရမည်ဟုဆိုတယ်ဆိုတာကို​တွေ့ရပါတယ်။ ဒါ့​ကြောင့် မိမိ၏စိတ်ဆန္ဒအ​ပေါ်လိုက်၍ ဝန်းရံ​သော "ခရစ်ရံ" ဖြစ်ကြရမည့်အစား ကိုယ်စိတ်ဆန္ဒကို ငြင်းပယ်ကာ ခံစားချက်​တွေထက် ဆန္ဒများစွာထက် ထိုသခင်​ယေရှုကိုသာ ​မျှော်ကြည့်​သောသူ၊ ထိုသခင်​နောက်ကိုသာ လိုက်​သောသူ၊ ကိုယ့်လက်ဝါးကားတိုင်ကို ကိုယ်ထမ်းကာ ယပလက်နှင့် ယာန်​သော "ခရစ်ယာန်" ဖြစ်​စေကြဖို့သာ အ​ရေးကြီးသည်ဆိုတာကို မ​မေ့ကြစို့နဲ့ရယ်။ 

ဒါ့​ကြောင့် မိတ်​ဆွေ ... ကျွန်ုပ်တို့ ခရစ်ယာန်​တွေက "ရ​ကောက်နဲ့​ပေါင်းတဲ့ ခရစ်ရံလား၊ ယပလက်နဲ့​ပေါင်းတဲ့ ခရစ်ယာန်လား" ဆိုတာ​တွေကို ခွဲခြားကာဆင်ခြင်ကြဖို့ အချိန်​ရောက်လာပါပြီ။ သခင်​ယေရှုက​တော့ "မင်းတို့ရဲ့ စိတ်ဆန္ဒကို ငြင်းပယ်ပြီး ငါ့​နောက်လိုက်ပါ၊ ကိုယ့်လက်ဝါးကားတိုင်ကိုယ်ထမ်းပါ" ဟုဆိုပြီး ယပလက်နဲ့သာ ယာန်​စေဖို့ သတိ​ပေးခဲ့ပါတယ်။ ဒါ့​ကြောင့် သင့်ရဲ့ ဝန်းရံ​သော ခရစ်ရံမှသည် ​အလို​​တော်ကို ဝန်ခံနိုင်​သော သခင့်နောက်လိုက်တဲ့ ခရစ်ယာန်အဖြစ်သို့ လမ်း​ကြောင်း​ပြောင်းနိုင်​စေဖို့ရာ ဆန္ဒများစွာအတွက် ဝန်းရံခြင်း၊ ခံစားချက်များစွာအတွက် ဝန်းရံခြင်း​တွေကို ဖယ်ရှားကာ "ခရစ်ယာန်" ဖြစ်ကြပါစို့။ 

ဘုရားရှင်ဆက်လက်စကား​ပြောပါ​စေ။ 

#Titus_KyawNyi 

Photo Crd: Internet