ဆာလောင်ခြင်းမှသည်
ဆာလောင်မှုတစ်ခုမှသည် အပြစ်ဒုစရိုက်ကိုလုပ်ဆောင်ရန် အမြဲတမ်းတိုက်တွန်းလေ့ရှိသည်။ ပစ္စည်းဥစ္စာတပ်မက်မှုသည် ထိုအရာကို မည်သို့ရယူရန်လုပ်ဆောင်ရမည်ဆိုသည့်ဘက်ကို တွန်းပို့တတ်သည်။ ထိုမှတဆင့် ခိုးယူမလား၊ ဓါးပြတိုက်မလား၊ မတရားသိမ်းယူမလား စသဖြင့် မကောင်းမှုဘက်၌ အားပြုလာစေတတ်ကြသည်။
ဓမ္မရာဇဝင်ဒုတိယစောင် အခန်းကြီး (၁၁)တွင် ဒါဝိဒ်ကိုကြည့်လျှင် မိန်းမတစ်ယောက်ရေချိုးသည်ကိုမြင်၍ သူ၏ဆာလောင်မှုသည် မေထုန်၌ဖြစ်နေခဲ့သည်။ သူ့တွင် အခြားသော မောင်းမများရှိသော်လည်း ထိုမိန်းမ (ဗာသရှေဘ) ကိုသာ တပ်မက်ခဲ့သဖြင့် မတရားမှုကိုပြုကာ ကျူးလွန်ခဲ့သည်မဟုတ်ပါလား။ ခဏတာဆာလောင်ခြင်းမှသည် ဒုစရိုက်လွန်ကျူးခြင်းကို လုပ်ဆောင်စေခဲ့ပေသည်။
ထိုဆာလောင်မှုသည် ပစ္စည်းဥစ္စာလား၊ မေထုန်လား၊ ရာထူး၊ အာဏာ၊ ငွေကြေး၊ ဂုဏ်သတင်း စသဖြင့် အမျိုးမျိုးဖြစ်နိုင်သည်။ သို့သော် ထိုဆာလောင်မှုကိုသာ အခွင့်ပေးလိုက်မိသည့် နောက်တွင်တော့ မတရားမှုကိုလုပ်ဆောင်ရန်ဝန်မလေးတော့သလို အဓမ္မမှုကိုပြုကျင့်ရန် လက်မရွံ့တော့ပါ။ အကြမ်းဖက်ခြင်း၊ နှိပ်စက်ခြင်း၊ လူ့အသတ်သတ်ခြင်းပင်လုပ်ဆောင်ရပါစေဦးတော့ မိမိတို့ဆာလောင်မှုအတွက် အလိုရမက်ပြည့်စုံရန်သာ အရေးကြီးသည်ဟုပင် သဘောထားကာ လုပ်ဆောင်ကြသည်အထိ လူစိတ်ပျောက်သွားတတ်ကြပေသည်မဟုတ်ပါလား။
ရှင်ယာကုပ်ဩဝါဒစာ ၁:၁၄
မိမိတပ်မက်သောစိတ် ဆွဲငင်ဖြားယောင်းခြင်းကို ခံသောသူမည်သည်ကား၊ အပြစ်သွေးဆောင်ခြင်းသို့ ရောက်တတ်၏။
မကောင်းသောအရာများကို ကြံစည်ခြင်း၊ လူ့အသက်ကိုသတ်ခြင်း၊ သူ့မယားကိုပြစ်မှားခြင်း၊ မိန်းမလွတ်နှင့်ပြစ်မှားခြင်း၊ သူ့ဥစ္စာကိုခိုးခြင်း၊ မမှန်သောသက်သေ ခံခြင်း၊ သူ့အသရေကို ဖျက်ခြင်း၊ အကြမ်းဖက်ခြင်း၊ နှိပ်စက်ခြင်း စသဖြင့်သောအရာတို့သည် နှလုံးထဲကထွက်လာသည်မဟုတ်ပါလား။ ထိုသို့သောအရာများသည် သူတပါးစေခိုင်းခြင်းကြောင့်မဟုတ်ပဲ မိမိတို့အတွက် အကျိုးစီးပွား၊ ရာထူး၊ စည်းစိမ် စသဖြင့် တစ်ခုခုကိုရယူလို၍သာ မိမိတို့၏ တပ်မက်သော ဆာလောင်ခြင်းကြောင့် ဖြစ်တည်လာသော အရာများဟုဆိုလျှင်လည်း မမှားချေ။
ထို့ကြောင့် မိတ်ဆွေနှင့် ကျွန်တော်တို့၏ဆာလောင်ခြင်းသည် ငွေကြေးလား၊ ဂုဏ်လား၊ အာဏာလား၊ မေထုန်လား ဘာတွေပဲဖြစ်နေပါစေ "မိမိတပ်မက်သောစိတ် ဆွဲငင်ဖြားယောင်းခြင်းကို ခံသောသူမည်သည်ကား၊ အပြစ်သွေးဆောင်ခြင်းသို့ ရောက်တတ်၏။" ဟုဆိုသည့်အတိုင်း မိမိတို့၏ ဆာလောင်ခြင်းမှသည် ဘာတွေများမှားယွင်းမှုဖြစ်နေစေမိပြီလဲ ...
ဘုရားရှင်ဆက်လက်စကားပြောပါစေ။
#Titus_KyawNyi
Photo Crd: Internet