"ယုံကြည်ခြင်းအားဖြင့် ​ကျေးဇူး​တော်​ကြောင့် ကယ်တင်ခြင်းသို့​ရောက်ရ၏" ဟူ၍ ကျမ်းစာလာ၏။ 

ထို့​ကြောင့် ကယ်တင်ခြင်းသို့​ရောက်ရန်အတွက် ယုံကြည်ခြင်းတစ်ခုတည်းသာလျှင် လိုအပ်သည်ကို နားလည်စရာရှိ​ပေသည်။ ကျွန်ုပ်တို့၏ လုပ်​ဆောင်သမျှ​သော အရာရာတို့၏ ထပ်​မံပေါင်းထည့်ခြင်းများ​ကြောင့် ကယ်တင်ခြင်းသို့​ရောက်ရသည် မဟုတ်ပါ။ ယုံကြည်ခြင်းနှင့် ကျင့်​ဆောင်သမျှ​သော ပညတ်တရားများ၊ ယုံကြည်ခြင်းနှင့် မိမိလုပ်​ဆောင်မှုအ​ပေါ် မူတည်​နေ​သော ​ချစ်ခြင်းများ ​မေတ္တာများ စသဖြင့် လားလားမျှမဆိုင်ပါ။ 

ဧဖက်တွင်တိတိကျကျ​ဖော်ပြထား​သော "ကိုယ်ကုသိုလ်ကြောင့် ကယ်တင်တော်မူခြင်းသို့ ရောက်သည်မဟုတ်။ သို့ဖြစ်၍ အဘယ်သူမျှ ဝါကြွားစရာ အခွင့်မရှိ" ဟူသည်ကို ​​စေ့​စေ့ကြည့်ကာ ဆင်ခြင်ဖို့ရန်အ​ရေးကြီးသည်ကို နားလည်​စေချင်ပါသည်။ ထို့​ကြောင့် ငါတို့က ယုံကြည်ခြင်း​နှင့် ချစ်ခြင်း​ကြောင့်၊ ငါတို့က ​မေတ္တာပြလို့၊ ငါတို့၏ လုပ်​ဆောင်သမျှအရာရာ​ကြောင့် ကယ်တင်ခြင်းသို့​ရောက်သည်ဟု ထင်မိ​နေလျှင်​တော့ ​ခရစ်​တော်၏ အ​သေခံခြင်းသည် အချည်းနှီးသက်သက်ပင်ဖြစ်​နေ​ပေ​တော့မည်မဟုတ်ပါလား။ 

ဂလာတိဩဝါဒစာ ၂:၂၁
ဘုရားသခင်၏ကျေးဇူးတော်ကိုငါမပယ်။ ပညတ်တရားကိုအမှီပြု၍ ဖြောင့်မတ်ရာသို့ ရောက်နိုင် လျှင် ခရစ်တော်သည်အချည်းနှီး အသေခံတော်မူပြီ။ 

အချို့ကလည်း ရှင်ယာကုပ်ဩဝါဒစာမှ "အကျင့်နှင့်ကင်းသော ယုံကြည်ခြင်းသည် အ​သေ" ဟူသည့်အချက်ကိုယူပြန်၍ ကယ်တင်ခြင်းအတွက် ထိုအကျင့်လိုအပ်သည်ဟုယူကာ ထိုအကျင့်သည်ပင်လျှင် "ချစ်ခြင်း​မေတ္တာ" ဟူ၍ နာမည်တပ်ပြန်၏။ အ​ဘယ့်​ကြောင့်ဆို​သော် (၁​ကော ၁၃:၁၃) ၏ "ယခုတွင်ယုံကြည်ခြင်း၊ မြော်လင့်ခြင်း၊ ချစ်ခြင်း၊ ဤသုံးပါးတည်လျက် ရှိ၏။ ဤသုံးပါးတို့တွင် ချစ်ခြင်း၊ မေတ္တာသည် အမြတ်ဆုံးဖြစ်သတည်း" ဟူ​သောအချက်နှင့်​ပေါင်းထည့် ဆွဲယူ၍ ယူဆကာ ယုံကြည်ခြင်းနှင့် ချစ်ခြင်း​မေတ္တာ​ပေါင်းထည့် လုပ်​ဆောင်ခြင်းသည် ကယ်တင်ခြင်းဟူ၍ ယူဆလိုက်ခြင်းဟုလည်းနားလည်ထားကြဟန် တူ၏။ (နားလည်လွယ်​အောင်ဆိုရလျှင် ​"​ကောင်းမှု​ပေါင်းထည့်ခြင်း၊ ကုသိုလ်ပြုခြင်း၊ ​မေတ္တာပြလုပ်​ဆောင်ခြင်း" ဟူ၍လည်း အမည်တပ်လျှင် တပ်ကြ​သေးသည်။) 

သို့​သော်လည်း ထိုအချက်များကို အနက်ဖွင့်ရာတွင် မှားယွင်းစွာအနက်ဖွင့်ခြင်းဟု နားလည်ရသည်။ ဥပမာ ရှင်ယာကုပ်ဩဝါဒစာသည် မည်သည့်အ​ခြေအ​နေတွင် မည်သူတို့အား မည်သည့်အ​ကြောင်းအရာ​များကြောင့် ​ရေးသား​ထားသည်ကိုလည်း သိထားရမည်။ အကျဥ်းအားဖြင့်ဆိုရလျှင် ထိုကာလအချိန်တွင် ​လောကသားများ၏ အသက်ရှင်ခြင်းအတိုင်း ​အသက်ရှင်ကြခြင်းများ၊ အနှိပ်စက်ခံရချိန်ကာလတွင် မည်သို့ရှင်သန်ရမည် စသဖြင့်သတိ​ပေးထားခြင်းဖြစ်မည်။ ထို့​ကြောင့် "ကယ်တင်ခြင်း" ရလျှင်ပြီးပြီ၊ ​လောကသားများကဲ့သို့ကြိုက်သလို​နေထိုင်မည်ဟူသည့် သူများအား သွန်သင်ထားခြင်းတစ်ခု အပါအဝင်ဖြစ်သည်ဟူ၍လည်း နားလည်ရသည်။ 

သမ္မာကျမ်းစာကို အနက်ဖွင့်ရာတွင် ကိုယ်လိုချင်ရာကိုသာ ​ရွေးယူ၍ ကိုယ်အလိုရှိရာကိုသာ ချိန်တွယ်​ပြောဆိုခြင်းသည် အန္တရာယ်ရှိ​သော ဖွင့်ဆိုချက်ဖြစ်သည်။ ထိုကျမ်းစာသည် မိမိတို့အား တိုက်ရိုက်​ပြောဆိုဖို့ရန် ​ရေးသားထားခြင်းမဟုတ်သည်ကိုလည်း သတိပြုရန်လိုသကဲ့သို့ ထို​ခေတ်ကာလ၏ အ​ခြေအ​နေ၊ ​ရေခံ​မြေခံသ​ဘောတရားများ၊ ယဥ်​ကျေးမှုဓ​လေ့ထုံးစံတို့နှင့် မည်သူက မည်သူ့ကို မည်သည့်အချိန်ကာလတွင် မည်သည့်အတွက်​ကြောင့် ​ပြောဆိုသနည်းဟူသည့် အရာများကိုလည်း ထည့်သွင်းစဥ်းစားရမည်ဖြစ်သည်။ 

အချုပ်အားဖြင့်ဆိုရ​သော် ကယ်တင်ခြင်းသည် ယုံကြည်ခြင်းအားဖြင့် ​ကျေးဇူး​တော်​ကြောင့်သာဖြစ်သည်။ ​မေတ္တာ​တော်ရှင်ဘုရားကို ယုံကြည်လက်ခံ၍ အသက်တာ​ပြောင်းလဲလာ​သော ခရစ်ယာန်အသက်တာ၏ အသက်ရှင်ခြင်းသည် ထိုသခင်ဘုရားနှင့် ဆက်သွယ်မှုရှိ​နေ​သော​ကြောင့် ​ထိုဘုရားထံမှလာ​သော ​ချစ်ခြင်း​မေတ္တာများသည် ပြန်လည်စီးထွက်သည်။ ထို့​ကြောင့် ခရစ်ယာန်အသက်တာ၌ ​ချစ်ခြင်း​မေတ္တာပါဝင်​နေသည်၊ ​မေတ္တာပြသည်၊ ​ဖေးမသည်၊ ပါဝင်ကူညီတတ်သည်။ ထို့​ကြောင့် "နှစ်ခြင်းခရစ်ယာန်တို့သည် ယုံကြည်ခြင်းတစ်ခုပဲ ​မေတ္တာမပါ" ဟူ​သော လိုရာဆွဲ၍​ပြောဆိုထား​သော ဗီဒီယိုဖိုင်တစ်ခုအား ရှုံ့ချလိုပါသည်။ ထိုသို့ဆိုခြင်းသည်ပင်လျှင် "Saving Faith and Living Faith" ကိုနားမလည်​သော​ကြောင့်ဟုပင် ကျွန်ုပ်ယူဆမိသည်။ 

ကျွန်ုပ်တို့၏ ​မေတ္တာပြခြင်းများသည် ကယ်တင်ခြင်းရရန်အတွက်လုပ်​ဆောင်ခြင်းမဟုတ်သလို၊ ကယ်တင်ခြင်းရပြီးသည်ဖြစ်၍ ထိုဘုရားထံမှစီးဆင်း​သော ​ချစ်ခြင်းမေတ္တာကိုခံစားရ​သော​ကြောင့်သာ ပြန်လည် ​မေတ္တာပြခြင်း ပြန်လည်စီးထွက်ခြင်းများဖြစ်သည်ကို နားလည်နိုင်ဖို့ရာ ဘုရားရှင်​ကောင်းကြီးရှိပါ​စေ။ သို့မဟုတ်လျှင် ကယ်တင်ခြင်းမရ​သေး​သည့် အခြား​သောသူများပင်လျှင် သာ၍​မေတ္တာပြတတ်၊ သာ၍သည်းခံတတ်ကြသည်ကို သိကြ​ပေလိမ့်မည်ဟုထင်ပါသည်။ 

ထိုအရာများကို အလွဲယူ၍ မိမိ၏ချစ်ခြင်း​မေတ္တာပါမှ ကယ်တင်ခြင်းပြည့်စုံမည်ဆိုလျှင်​တော့ ကျွန်ုပ်တို့၏ ကြိုးစားလုပ်​ဆောင်မှုများ အားထုတ်ခြင်းများပါဝင်​နေ​ပေ​တော့မည်မဟုတ်ပါလား။ ဘုရားသခင်ထံမှလာ​သော ​ချစ်ခြင်း​မေတ္တာမပါဝင်ဘဲ သင်မည်မျှ ​မေတ္တာပြနိုင်မည်နည်း၊ မည်သို့ ချစ်နိုင်မည်နည်း ... 

ဘုရားရှင်ဆက်လက်စကား​ပြောပါ​စေ။ 

#Titus_KyawNyi 

Photo Crd: Internet