လူမိုက်ဆိုသည်မှာ ​ကောင်းသည့်အရာကို သိ​သော်လည်း မ​ကောင်းသည့်အရာကိုသာ ​ရွေးချယ်လုပ်​ကိုင်ခြင်း၊ ​ကောင်းတာကိုသိ​သော်လည်း မ​ကောင်းတာကိုသာ လက်မလွှတ်နိုင်ဖြစ်၍ ဆက်မှားနေခြင်းမျိုးကို ဆိုလိုသည်။ ထိုသည်မှာ ​လူမိုက်၏ အဓိပ္ပါယ်ဖွင့်ဆိုချက်ဟု အားလုံးသိကြမည်ဖြစ်သည်။ 
အနိုင်ကျင့်ခြင်းသည် မ​ကောင်းမှန်းသိ​သော်လည်း အနိုင်ကျင့်သည်၊ ခိုးယူခြင်းသည် မ​ကောင်းမှန်းသိ​သော်လည်း ခိုးယူသည်၊ သူ့အသတ်သတ်ခြင်းသည် မ​ကောင်းမှန်းသိ​သော်လည်း သတ်သည်၊ ထိုသို့ ဒုစရိုက်အပြစ်များကို မ​ကောင်းမှန်း သိသိရက်နှင့် လွန်ကျူးခြင်း ကျူးလွန်ခြင်း​တွေသည်ပင်လျှင် လူမိုက်ဖြစ်​ပေသည်ဟု ​လောကီအဓိပ္ပါယ်ဖွင့်ဆိုကြ​လေသည်။ 

တိရိစ္ဆာန်သဘာဝအတိုင်း ကြီးနိုင်ငယ်ညှဥ်းပြုခြင်းသည် မ​ကောင်းမှန်းသိကြ​သော်လည်း လူစိတ်​ပျောက်ကာ လူ့တိရိစ္ဆာန်ဟုပင်​ခေါ်တွင်​လောက်သည်အထိ မိုက်လုံးကြီးကြ​သော လူမိုက်များသည် ဤ​လောကကြီးတွင် မ​ကောင်းမှန်းသိသိနှင့် မိုက်လုံးကြီးလျှက်​နေကြသည်။ ထိုအရာများသည် ​လောကကြီးတွင် လူမိုက်အဓိပ္ပါယ်ဖွင့်ဆိုချက်အချို့ပင်ဖြစ်​ချေသည်မဟုတ်ပါလား။ 

ရှင်မဿဲခရစ်ဝင် ၇:၂၆
အကြင်သူသည် ငါဟောပြောသော ဤစကားကိုကြား၍ နားမထောင်ဘဲနေ၏။ ထိုသူသည် သဲပေါ်မှာ အိမ်ဆောက်သော လူမိုက်နှင့်တူကြောင်းကို ငါပုံပြမည်။ 

တရားစကားကိုကြားထား၍ နားမ​ထောင်ခြင်း၊ နှုတ်ကပတ်​တော်သမ္မာတရားကို ကြားသိ​​သော်လည်း လိုက်​လျှောက်ခြင်းမရှိ​သော အသက်တာသည်ပင်လျှင် လူမိုက်ဖြစ်သည်ဟုနားလည်ရသည်။ ထိုသို့​သောသူသည် စုံစမ်း​သွေးဆောင်ခြင်းအမျိုးမျိုးကို ကြုံ​တွေ့ရလျှင် လဲပြိုကြမည့်လူမိုက်ပင်ဖြစ်​ပေသည်။ မနာလိုခြင်း၊ ​လောဘလွန်ကျူးခြင်း၊ ရန်လိုခြင်း၊ မတရား​သော​မေထုန်၏ ​သွေး​ဆောင်ခြင်း၊ ​လောကီတပ်မက်ခြင်း စသဖြင့်အမျိုးမျိုးတို့၏ ​သွေး​ဆောင်ခြင်းများကို လွယ်လွင့်တကူ လဲပြိုကျမည့် လူမိုက်ဖြစ်​ပေသည်မဟုတ်ပါလား။ 

မိုးရွာသဖြင့် ​ရေစီးခြင်း ​လေတိုက်ခြင်းကိုကြုံရသဖြင့် ပြိုလဲကျတတ်​သော သဲ​ပေါ်တွင်​ဆောက်သော အိမ်ကဲ့သို့ လူမိုက်သည် ပြိုလဲကျ​ပေမည်မဟုတ်ပါလား။ ကျွန်ုပ်တို့သည် နှုတ်ကပတ်​တော်ကို ခံယူရမည်၊ နား​ထောင်ရမည်၊ နှလုံးသွင်းထားရမည် သို့မှသာလျှင် ကြား​သော်လည်း နားမ​ထောင်သည့် လူမိုက်နှင့်ကွဲပြားခြားနားမည်မဟုတ်ပါလား။ 

ကျွန်ုပ်တို့သည် နှုတ်ကပတ်​တော်ကို ကြားသိ​ရသော်လည်း နားမ​ထောင်ခြင်း၊ တရား​သောလမ်းကို သိ​သော်လည်း မတရားခြင်းကိုသာ လုပ်​ဆောင်ခြင်း၊ ဓမ္မကိုသိ​သော်လည်း အဓမ္မ၌ရပ်တည်ခြင်း၊ မ​ကောင်းမှန်းသိ​သော်လည်း မစွန့်လွှတ်နိုင်ခြင်း၊ သမ္မာတရားကိုသိ​သော်လည်း မလိုက်​လျှောက်နိုင်​သော လူမိုက်ဖြစ်​နေပြီလားဆိုတာကို ယ​နေ့တွင် ဆင်ခြင်ကြည့်ပါစို့။ 

ဘုရားရှင်ဆက်လက်စကား​ပြောပါ​စေ။ 

#Titus_KyawNyi 

Photo Crd: Internet