မနာ​ရှေမင်းသည် ရာဇဝင်ထဲတွင် ဆိုးညစ်​သောမင်းဖြစ်သကဲ့သို့ ဘုရားသခင်စိတ်​တော်နှင့်မ​တွေ့​သော မင်းဆိုးတစ်ပါးဖြစ်​ကြောင်းကို ကျွန်ုပ်တို့​တွေ့ရ​ပေသည်။ အသက်ငယ်စဥ်တွင်ပင် နန်းထိုင်ရ​သောသူလည်းဖြစ်သည်။ ငါးဆယ့်ငါးနှစ်စိုးစံခဲ့ပြီး ထာဝရဘုရား​ရှေ့၌ ဒုစရိုက်ကိုပြုသူဟုဆိုလျှင်လည်း မမှား​ချေ။ တနည်းဆိုရလျှင် သူ့ပ​ရောဂ​ကြောင့် တိုင်းပြည်ဒုက္ခ​ရောက်ခဲ့ရ​ပေသည်။ 

ထင်ရှား​သော ဒုစရိုက်တစ်ခုမှာ ယခင်ဖယ်ရှားခဲ့​သော အရာများကို ပြန်လည်လုပ်ဆောင်ခြင်းလည်း အပါအဝင်ဖြစ်သည်။ ထိုအရာသည် ဖခင်ဖြစ်သူဖျက်ဆီး​သောကုန်းတို့ကို ပြန်လည်ပြုပြင်၍ ဗာလအဖို့ ယဇ်ပလ္လင်တည်ခြင်းပင်ဖြစ်သည်။ ထိုအချိန်ကာလတွင် ဗာဗုလုန်အင်ပါယာသည် အရှိန်အဝါကြီးထွားလာချိန်ဖြစ်သကဲ့သို့ သူတို့သည် ​"Astrological Worship" ဗေဒင်နက္ခတ်ကိုးကွယ်မှုများလုပ်​ဆောင်​လေ့ရှိသည်ကိုလည်း အတုယူကူးချခဲ့ဟန်တူ​ပေလိမ့်မည်။ ထို့​ကြောင့် ပုံစံ​ဟောင်းသာမက ပုံစံသစ်များဖြင့်လည်း ယုဒတို့အတွက် ပြစ်မှားခြင်းများကိုဖြစ်​စေခဲ့သည်။ ထို့အပြင် အခြားအခြား​သော ဒုစရိုက်များစွာကိုလည်း ​တွေ့ရသည်။ 

ဓမ္မရာဇဝင် စတုတ္ထစောင် ၂၁:၁၆
မနာရှေသည် ထာဝရဘုရားရှေ့တော်၌ ဒုစရိုက်ကိုပြု၍ ယုဒအမျိုးကိုပြစ်မှားစေသော အပြစ်မှတစ်ပါး အပြစ်မရှိသော သူအများတို့ကိုသတ်၍ ယေရုရှလင်မြို့တစ်ဖက်မှ တစ်ဖက်တိုင်အောင် သူတို့အသွေးနှင့် ပြည့်စေခြင်းငှာပြု၏။ 

က​လေးများအား သတ်ခြင်း၊ မိမိတို့၏ သားများကိုလည်း မီးဖြင့်ပူ​ဇော်ခြင်း၊ အာရှရပင်နှင့် တူ​အောင်ထု​သောရုပ်တု၊ ကာလ​ဗေဒင်အတတ်များ၊ ပြုစားတတ်​သောအတတ်များ၊ စုန်းအတတ်၊ နတ်ဝိဇ္ဇာအတတ် စသဖြင့်တို့ကိုလည်း အခွင့်​ပေးတတ်ပြန်​ပေ၏။ ထိုသို့​များစွာ​သော ဒုစရိုက်တို့ကိုပြု၍ ထာဝရဘုရား​ရှေ့​တော်၌ ညစ်ညူး​သောမင်းတစ်ပါးပင်ဖြစ်​ခဲ့​​လေသည်။ 

ထိုသို့​သောသူသည် ​ယေရုရှလင်မြို့၌ အသက် ၁၂နှစ်တွင်နန်းထိုင်၍ ၅၅နှစ်စိုးစံကာ ဒုက္ခ​ပေါင်းစုံ​ရောက်​စေခဲ့​သော်လည်း (ဓမ္မရာဇဝင် စတုတ္ထစောင် ၂၄:၃-၄) တွင်ယခုကဲ့သို့​တွေ့ရ​ပေသည်။ "မနော​ရှေမင်းပြုမိသမျှသော အပြစ်၊ အသေမခံထိုက်သော သူတို့ကိုသတ်၍ သူတို့အသွေးနှင့် ယေရုရှလင်မြို့ကို ပြည့်စေသော အပြစ်များကို ထာဝရဘုရားသည် လွှတ်တော်မမူ။" 

ထိုမင်းကျူးလွန်တတ်​သော အ​သေမခံထိုက်​၊ အပြစ်မရှိ​သောသူတို့အား သတ်​သောအပြစ်နှင့် ထိုသူတို့၏အ​သွေးကို မြို့၌ပြည့်​စေ​သော အပြစ်များကို ထာဝရဘုရားသည်လွှတ်​တော်မမူ​​ပေ။ 

ထာဝရဘုရားသည် မနာ​ရှေနှင့်သူ၏လူတို့အား မိန့်​​တော်မူ​သော်လည်း နားမ​ထောင်သဖြင့် အာရှုရိရှင်ဘုရင်၏ ဗိုလ်မင်းများထံ၌ မနာ​ရှေအဖမ်းခံခဲ့ရသည်။ သံကြိုးများဖြင့်ချည်​နှောင်ခြင်းကိုခံခဲ့ရကာ ဗာဗုလုန်မြို့သို့ ​ဖမ်းဆီး​ခေါ်​ဆောင်ခြင်းကိုခံခဲ့ရသည်ကို​တွေ့ရ​ပေသည်။ ထာဝရဘုရားသည် မနာ​ရှေအား​နောင်တရရန်အချိန်​ပေးထား​သော်လည်း သူသည် ​နောင်တမရ၊ လည်ပင်းခိုင်မာ​သောအမျိုးဖြစ်​ချေသည်။ သူ၏ အပြစ်များအတွက် ​နောင်တမရရုံသာမက၊ သူတပါးအားလည်း လွန်ကျူး​စေခဲ့သလို၊ သူသည်လည်း ​ပျော်ပါးစွာ လွန်ကျူးခဲ့သည်။ ထာဝရဘုရားမိန့်​တော်မူသည့်အချိန်တွင်လည်း နားမ​ထောင်ခဲ့သူပင်ဖြစ်​ပေသည်။ 

ရာဇဝင်ချုပ် ဒုတိယစောင် ၃၃:၁၂-၁၃
ထိုသို့မနာရှေသည် ဆင်းရဲဒုက္ခကို ခံရသောအခါ၊ မိမိဘုရားသခင် ထာဝရဘုရားကို တောင်းပန်၍၊ ဘိုးဘေးတို့၏ ဘုရားသခင့်ရှေ့မှာ ကိုယ်ကို အလွန်နှိမ့်ချလျက်၊
ဆုတောင်းပတ္ထနာ ပြုသောစကားကို ဘုရားသခင် နားထောင်နာယူ၍၊ မနာရှေအုပ်စိုးရင်းပြည်၊ ယေရုရှလင်မြို့သို့ တစ်ဖန် ပို့ဆောင်တော်မူ၏။ ထိုအခါ ထာဝရဘုရားသည် ဘုရားသခင်ဖြစ်တော်မူကြောင်းကို မနာရှေသိရ၏။ 

တခါတ​လေတွင် ကျွန်​တော်တို့၏ ပြုမိမှား​သောအပြစ်ဒုစရိုက်များသည် ခွင့်လွှတ်ရန်မထိုက်တန်​တော့​ဘူးဟုလည်း မိမိကိုယ်တိုင်သိရှိသည်။ အပြစ်ကများလွန်းသဖြင့် ​ဆေးမမှီ​တော့ဘူးဟုလည်း ​တွေးထင်မိနိုင်သည်။ မနာ​ရှေကဲ့သို့ မိမိ၏လက်တွင်လည်း အပြစ်မရှိ မ​သေသင့်​သောသူများ၏ အ​သွေးများအလိမ်းလိမ်း​ပေကျံ​နေလျှင် ​ပေကျံ​နေ​ပေဦးလိမ့်မည်။ 

"မိမိဘုရားသခင် ထာဝရဘုရားကို တောင်းပန်၍၊ ဘိုးဘေးတို့၏ ဘုရားသခင့်ရှေ့မှာ ကိုယ်ကို အလွန်နှိမ့်ချလျက်၊ ဆုတောင်းပတ္ထနာ ပြုသောစကားကို ဘုရားသခင် နားထောင်နာယူ၍" ဟုဆိုသဖြင့် မနာ​ရှေ​နောင်တရခဲ့သည်ဟုဆိုကြပါစို့။ "ဆု​တောင်းပတ္ထနာ"ကို အ​သေးစိပ်မ​ဖော်ပြထား​သော်လည်း ထို​နောင်တကို ဘုရားသခင်လက်ခံခဲ့သည်။ ထိုအရာအားဖြင့် "ထာဝရဘုရားသည် ဘုရားသခင်ဖြစ်​တော်မူ​ကြောင်း" ကိုလည်း မနာ​ရှေသိခွင့်ရခဲ့​ပေသည်မဟုတ်ပါလား။ 

ဘုရားသခင်သည် သင့်ကိုလည်း ​နောင်တရရန်အချိန်ကို​စောင့်​နေသည်။ "ထာဝရဘုရားသည် ဘုရားသခင်ဖြစ်​တော်မူ​ကြောင်း" ကို မနာ​ရှေသိခွင့်ရသွားသကဲ့သို့ သင်သည်လည်း ထိုသိခွင့်ရခြင်းကို ခံစားရဖို့ရာ ဘုရားရှင်​ကောင်းကြီးရှိပါ​စေ။ ယ​နေ့မှာပင် နောက်မကျခင် ​နောင်တရကာ အထံ​တော်သို့တိုးဝင်လိုက်ပါ မိတ်​ဆွေ။ 

ဘုရားရှင်ဆက်လက်စကား​ပြောပါ​စေ။ 

#Titus_KyawNyi 

Photo Crd: Internet