တစ်​နေ့မှာ အဘွားအိုတစ်​ယောက်က လမ်းမှာဖြတ်သွားတဲ့ကား​တွေကို တား​နေခဲ့တယ်။ သူ့မှာလည်း အိတ်ကြီးတစ်အိတ်ပါလာခဲ့ပါတယ်။ ဒီလိုနဲ့ ကားတစ်စီးက လမ်းကြုံ​ခေါ်တင်လိုက်​လေရဲ့။ အဘွားအိုက ကားကြုံလိုက်စီးခွင့်ကို ရခဲ့တာ​ပေါ့။ ဒါ​ပေမယ့် ထူးဆန်းတာတစ်ခုက​တော့ ကား​ပေါ်​​မှာ ထိုင်စီးရ​သော်လည်း အဘွားအိုက သူ့အိတ်ကြီးကို ​​ဘေးမချထားပဲနဲ့ ခေါင်း​ပေါ်မှာသာ ဆက်ပြီး​တော့ ရွက်ထားခဲ့တယ်။ 

ဒါကို ကားဆရာက ထူးဆန်း​နေလို့ မ​နေနိုင်​တော့တာနဲ့ မေး​လိုက်တယ်။ "အဘွား ... ကား​ပေါ်မှာ​နေရာလဲကျယ်ပါတယ် ချထားလို့ရတယ်​လေ၊ ပင်ပန်းခံပြီး ဘာဖြစ်လို့ရွက်ထားတာလဲ" လို့ဆိုလိုက်​လေရဲ့။ ဒါကိုအဘွားအိုက ဒီလိုပြန်ဆိုတယ် "ငါ့​မြေးရယ် ... အဘွားကို ကား​ကြုံခေါ်တင်တာနဲ့တင်​ ကျေးဇူးတင်​နေပါပြီကွယ် ... ဒီအိတ်ကို​တော့ အဘွားဆက်ပြီး ရွက်ထားလိုက်ပါ​တော့မယ် ... ငါ့​မြေးကို​ရော ကားကို​ရော အားနာစရာပါကွယ်" 

တကယ်​တော့ အဘွားအိုက သူ့အိတ်ကြီးကို ရွက်ရွက် ထမ်းထမ်း၊ ချထားချထား အတူတူပဲဖြစ်တယ်။ အားနာပြီး​တော့ သူတတ်နိုင်တဲ့ အိတ်ကိုထမ်းပြီးလိုက်သွားချင်တယ်​၊ ကားဝန်​ပေါ့​စေမယ်ပေါ့။ ဒီလိုမျိုး ခရစ်ယာန်​တွေလည်း ရှိတတ်ကြပါတယ်။ သခင်​ယေရှုပြု​ပေး​သော ​ကျေးဇူး​တော်ကလုံ​လောက်လျှက်ရှိပြီးသားပါ၊ ဒီကယ်တင်ခြင်းက ပြည့်စုံပြီးသားဖြစ်တယ်။ သင့်ဘက်က ဘာတစ်ခုမှ လုပ်​ပေးစရာမလိုဘူး၊ ကယ်တင်ခြင်းက ​ကျေးဇူး​တော်​ကြောင့်သာဖြစ်သလို သင့်ရဲ့အိတ်ကိုထမ်းထားခြင်းကဲ့သို့ သင့်ရဲ့ လုပ်​ဆောင်ချက်​ကြောင့် ပြည့်စုံတာမဟုတ်ဘူး၊ သင့်ရဲ့ကူညီလုပ်​ဆောင်​ပေးခြင်း​ကြောင့် ကိုယ်​တော်လုပ်​ပေးရတာ ဝန်​ပေါ့တာပေါ့ဆိုတာမျိုး လုံးဝလုံးဝ မဟုတ်ဘူးဆိုတာကို​တော့ နားလည်ဖို့လိုပါတယ်။ ကယ်တင်ခြင်းက သင့်ဘက်က တစ်ခုခုလုပ်​ပေးရလို့ ပြည့်စုံတာမျိုး လုံးဝလုံးဝ မဟုတ်ပါဘူး။ 

​နောက်အဖြစ်တစ်ခုက​တော့ ... အသိမိတ်​ဆွေတစ်​ယောက်​၏ ပြောစကား​လေးကို ပြန်ကြားဖူးပါတယ်။ "ဟာကွာ ငါ့အပြစ်ကို ငါပဲခံမှာ​ပေါ့၊ ဘယ်တရားပါ့မလဲ" တချို့ကလဲ ဒီလို ကိုယ့်အိတ်ကိုယ်ထမ်းချင်ကြပါတယ်။ ဒါ​ပေမယ့် လုပ်နိုင်သလားဆို​တော့လည်း မလုပ်နိုင်ကြပြန်ပါဘူး။ ကိုယ်လဲ မတတ်နိုင်ဘူးဆိုတာကို သိ​နေ​သော်ငြားလည်း တင်းခံ​နေကြခြင်း​ပေါ့။ 

တချို့ကလည်း သခင်​ယေရှုလုပ်​ပေးတယ်ဆိုတာကို လက်မခံပါဘူး။ မဖြစ်နိုင်ဘူးဟု ဆိုကြပါတယ်။ ဘယ်လိုဖြစ်နိုင်မလဲ အပြစ်ကိုကိုယ်စားခံလို့ရမလား၊ သခင်​ယေရှု လုပ်​ပေးခဲ့တာကို ဘယ်လိုလုပ်ပြီး ငါတို့ကရနိုင်မလဲ မဖြစ်နိုင်ဘူးဟုဆိုတတ်ကြပြန်တယ်။ ​လောကမှာ လူ​တွေလက်ခံကြတဲ့အရာ​လေး​တွေကို ကြည့်မယ်ဆိုရင်ဖြင့် လူတစ်​ယောက်၏ ​ကျေးဇူးပြုခြင်းကို လက်ခံကြတယ်။ ကူညီခြင်း၊ ​ဖေးမခြင်း၊ ​ငွေ​ရေး​ကြေး​ရေ၊ ​လူမှု​ရေး စသဖြင့် ပြု​ပေးခြင်း​ပေါ့။ ဟုတ်ပြီ ဒါက​တော့ သက်ရှိ သက်ရှိခြင်းပြု​ပေး​သော ​ကျေးဇူးပြုခြင်း၊ မြင်ရ​သောအရာလို့ဆိုကြပါစို့။ 

​နောက်တစ်ခုက​တော့ အသက်ရှင်​သောသူမှ ​သေ​သောသူအတွက် ရည်စူး​သော အလှူအတန်း၊ ​ကျေးဇူးပြုခြင်း၊ ကုသိုလ်ပြု​ပေးခြင်း၊ ရက်လယ်၊ လလယ်၊ နှစ်လယ် စသဖြင့် ​ကျေးဇူးပြုကြတယ်။ မမြင်ရ​သော ​သူအ​ပေါ် ​ကျေးဇူးပြုခြင်းဖြစ်သလို ထိုသူသည် တကယ်ကို ရရှိသွားကြတယ်ဟု ယုံကြည်လက်ခံကြတယ်။ မမြင်ရ​သော​ကြောင့် မဖြစ်နိုင်ဘူးဟုမဆိုနိုင်ကာ မမြင်ရ​သော်လည်းပဲ ဆက်လက်၍ လုပ်​ဆောင်သွားကြတယ်။ ကိုရီးယား​၊ တရုတ်၊ တချို့မြန်မာ​တွေသည်လည်း ​မြေးမြစ်များသည် ဘိုးဘေး​တွေကို မမြင်ဖူးကြ​သော်လည်း ရည်စူးကာလုပ်​ဆောင်ကြသလို ဒီဘိုး​ဘေးများသည် ထို​ကျေးဇူးပြုခြင်းကို ရရှိသည်ဟုပင် ဆက်လက်လက်ခံယုံကြည်ကြသည်။ တရုတ်​ရိုးရာ ဆိုရင်လည်း အဝတ်​တွေမီးရှို့၊ ​ရွှေစက္ကူ၊ ​ငွေစက္ကူ၊ အိမ်ပုံစံငယ်​လေး​တွေ စသဖြင့်မီးရှို့​ပေးခြင်းသည် တမလွန်မှ သူရရှိ​စေခြင်းဟု ယုံကြည်ကြသည်။ 

ဒါ​တွေက လူလူချင်း ပြု​ပေး​သော ​ကျေးဇူးဖြစ်တယ်၊ ​သေ​သောသူအတွက် ရှင်ကျန်​သောသူမှ ပြု​ပေး​သော ​ကျေးဇူးလည်းဖြစ်ပါတယ်။ လူလူခြင်းပြု​ပေး​သော ​ကျေးဇူးကို​တောင် မိတ်​ဆွေလက်ခံ ယုံကြည်နိုင်​သေးတယ်ဆိုရင် ဘုရားပြု​ပေး​သော ​ကျေးဇူး​​တော်ကို လက်မခံနိုင်စရာ ဘာများရှိ​နေဦးမလဲ။ ​သေ​သောသူအတွက် ရှင်ကျန်သူ၏ ​ကျေးဇူးပြုခြင်းကို​တောင် ဖြစ်နိုင်တယ်ဟု လက်ခံနိုင်မှ​တော့ လွန်ခဲ့​သော နှစ်နှစ်​ထောင်​ကျော်တွင် သခင်​ယေရှုခရစ်​တော် ပြု​ပေးခဲ့​သော ​ကယ်တင်ခြင်း​ကျေးဇူး​တော်သည် သင့်အတွက်ဖြစ်တယ်ဆိုတာကို ဘာလို့လက်မခံနိုင်ရမှာလဲ ဆိုတာကို ပြန်လည်စဥ်းစားကြည့်ပါမိတ်​ဆွေ။ 

ရောမဩဝါဒစာ ၁၀:၉
အဘယ်သို့နည်းဟူမူကား၊ သင်သည် သခင် ယေရှုကိုနှုတ်ဖြင့် ဝန်ခံ၍၊ ဘုရားသခင်သည် သူ့ကို သေခြင်းမှ ထမြောက်စေတော်မူပြီဟု စိတ်နှလုံးထဲ၌ ယုံကြည်လျှင်၊ ကယ်တင်ခြင်းသို့ရောက်လိမ့်မည်။ 

​သေ​သောသူကို​တောင် လူလူခြင်း ​ကျေးဇူးပြု​ပေးနိုင်ကြတယ်လို့ သင်တကယ်ထင်​နေရင် သခင်​ယေရှုပြု​ပေး​သော ကယ်တင်ခြင်းကို သင်လက်မခံနိုင်ရ​လောက်​အောင် အဘယ်အရာ​တွေကများ သင့်ကို တားဆီးပိတ်စို့နေသလဲ။ ယုတ္တိတန်၏ မတန်၏​ပြောမည်ဆိုရင်လည်း ​သေ​သောသူအတွက် လူ၏ ​ကျေးဇူးပြုခြင်း နှင့် ဘုရား၏​ကျေးဇူးပြုခြင်းသည် ဘယ်အရာပို၍ ယုတ္တိတန်မည်နည်း။ နားလည်နိုင်ဖို့ရာ ဘုရားရှင်​ကောင်းကြီး​ပေးပါ​စေ။ 

ကယ်တင်ရာ​နေ့ရက်သည် ယ​​နေ့ပင်ဖြစ်​သော​ကြောင့် မိတ်​ဆွေက သခင်​ယေရှုခရစ်​တော်ကိုမြည်းစမ်းကြည့်ချင်တယ်ဆိုရင်​တော့ ... 

***ယေရှုခရစ်​တော်သည် ကျွန်​တော်/မ(အမည်)ရဲ့အပြစ်အတွက်လက်ဝါးကားတိုင်​ပေါ်မှာအ​သေခံအ​သွေးသွန်းပြီး သင်္ဂြုလ်ခြင်းကိုခံ​တော်မူပြီး​တော့ ကျမ်းစာလာသည့်အတိုင်း၃ရက်​မြောက်​သော​နေ့မှာရှင်ပြန်ထ​မြောက်တာကို ယုံကြည်လက်ခံပါတယ်။ *** 

ဘုရားရှင်ဆက်လက်စကား​ပြောပါ​စေ။ 

#Titus_KyawNyi 

Photo Crd: Internet